عيد الأضحى المبارك أجواءه مختلفة عن عيد الفطر المبارك، فذبح الأضاحى فى عيد الأضحى أكثر مايميز أجواءه، ومع ذبح الأضاحى تنشط بعض المهن، ومنها الجزار الموسمى، الذى يعمل خلال عيد الأضحى فقط، ولكنه يمتهن مهنة أخرى فى أيامه العادية، رصدنا بعض من أجواء الذبح خلال أول وثان أيام عيد الأضحى المبارك..
على العربى "موظف" قال إنه ينتظر عيد الأضحى من العام للعام، للعمل كجزار فى هذا الموسم، "عاده اعتدت عليها من ١٠ سنوات، وبحس بالعيد لما ادبح الذبائح"، وعندى أولادى باخدهم معايا فى الذبح بيساعدونى".
وأضاف العربى قائلا: "زباينى بيتفقوا معايا قبل العيد، عشان ارتب مواعيد كل دبيحة، ويكون فى تنظيم وقت للدبائح ونخلص أيام الذبح على خير ومن غير ماحد يزعل".
"أنا بساعد بابا فى العيد، وهو بيدبح الخرفان والعجول، فرحة العيد بتكمل لما بندبح الأضاحى للناس، هو العيد الكبير ايه غير دبح"، هكذا قال مروان العربى، مضيفا أنه من صغره يساعد والده أثناء الذبح، "وكل مااكبر مساعدتى لوالدى بتزيد عشان بفهم فى أمور الذبح أكثر".
محمد عبد الحميد مدير إدارة ويعمل جزار وقت عيد الأضحى، قال: "بقالى ١٥ سنة شغال جزار فى العيد، الموضوع ده اخدته من والدى، هو اللى علمنى طريقة الذبح الصحيحة، وحبيت اكمل بعده لأنها عادة الواحد بيؤجر عليها".
وأضاف قائلا: "قبل العيد بأيام بجهز أدوات الذبح من سكاكين وما إلى غير ذلك، وعندى مكان فى بيتى بدبح فيه، والزبائن بتيجى عندى، وباخد أجرتى على الذبح".
وأكد عبد الحميد قائلا: "أنا مش عامل تسعيره معينة مقابل الذبح، لأن الأساس عندى الثواب اللى باخده من ذبح الأضاحى وفرحة العيد، بتكون أسعار بسيطة مفسهاش استغلال ولا مغالاة، أما بالنسبة للأخذ من الذبيحة، لو الزبون عاوز كل حاجة من الذبيحة بياخدها مش بشترط عليه أنى اخد منه حاجة، واللى عاوز يسيبه بيروح لصاحب نصيبه".
محمود البرعى يعمل جزار أثناء عيد الأضحى قال: "الذبائح بتختلف فى وقت ذبحها، مفيش وقت محدد لذبح الأضحية، يعنى الخروف غير العجل، فى الوقت اللى بيحتاجه أثناء الذبح، معايا ابنى واخويا ومعانا ٣ مساعدين بيساعدونا فى الذبح".
وأضاف: "أنا بذبح، واخويا وابنى ومعاه المساعدين يبدأوا يشتغلوا، بسلخها وتكشيف الأرجل، وتعليقها، ويتم تجويفها من البطن، وغسلها بالماء النظيف، وشقها نصفين وبعدها تقسيمها أربع أجزاء، وبعدها يتم تشفية اللحم".
تستغرق الذبيحة من نصف ساعة للخراف، والعجول على حسب حجمها تبدأ من ساعة إلى ساعة ونصف وساعتين، لإنهاء عملية الذبح والتشفية كاملة.
